Il Cussegl federal ha elegì Anne Lévy sco nova directura da l'Uffizi federal da sanadad BAG. Ella succeda sin il prim d'october a Pascal Strupler ch'ha manà l'uffizi ils ultims diesch onns.
Da chasa en divers camps da la sanadad publica
Anne Lévy haja gronda experientscha da management e da manar. Ultra da quai haja ella er enconuschientschas excellentas dals temas dal BAG sco er dal sistem politic, scriva il Cussegl federal.
Anne Lévy è dapi il 2015 CEO da las Clinicas universitaras psichiatricas da Basilea. Avant ha la Bernaisa da 48 onns che viva a Basilea manà durant sis onns il sectur da protecziun da sanadad dal Departament da sanadad da Basilea-Citad. La futura directura dal BAG ha studegià scienzas politicas a Losanna e lavurà suenter sco spezialista da drogas tar la citad da Berna e tar il BAG. Là ha ella manà durant tschintg onns la secziun alcohol e tubac.