Adina dapli persunas vivan en chasadas pli grondas, vul dir er en abitaziuns communablas. Quai è probablamain ina consequenza da l’offerta d’abitaziuns ch'è vinavant stgarsa en Svizra. En consequenza sajan ils umans plitost pronts da viver en abitaziuns communablas, demussa in studi da la firma d’immobiglias Wüest Partner.
Dapi il 2021 pon ins observar in midament general: l'augment da chasadas pitschnas è sa reducì, quel da chasadas da trais persunas u dapli è creschì. Precis l'onn 2021 è er il dumber d'abitaziun affittadas libras tschessà ed ils fits da locaziun èn creschids pli spert ch'avant. Tenor il studi na sajan ils dumbers bass d'abitaziuns vidas er betg pli be in fenomen dals centers urbans
Il custs pli auts sforzian persunas d'abitar ensemen cun autras persunas. La tscherna da la furma d'abitar na reflecteschia betg necessariamain ils giavischs da blera glieud, scriva Wüest Partner. Quai demussia il fatg ch'il trend da blers onns mussava vers adina dapli chasadas pitschnas.
Abitar vegn vinavant pli char
Per l'onn che vegn fa Wüest Partner quint ch'ils tschains da locaziun creschian en media per 3,7%, d'ina vart pervi da l'augment dal tschains directiv da la Banca naziunala svizra e da l'autra vart cun quai ch'i na vegnan betg construidas bleras novas abitaziuns. En il segund quartal dal 2023 saja il dumber da permissiuns da construcziun per abitaziuns affittadas stà 10% sut la media dals ultims 10 onns. Or da quest motiv na fa la firma d'immobiglias betg quint che la situaziun sa calmia en ils proxims mais ed onns.
