Tissi en l'aua da baiver - Confederaziun ponderescha da scumandar chlorothalonil
Las lingias grassas enturn las valurs da chlorothalonil memia autas en pliras vischnancas svizras laschan entant er vegnir activa la Confederaziun. Ella ponderescha da scumandar il diever da fungicids che cuntegnan la substanza.
A partir dals 30 da fanadur duain organisaziuns da l'ambient pudair prender posiziun en chaussa. Anc quest atun vul l'Uffizi federal d'agricultura decider.
Dapi 40 onns en acziun
Ils ultims onns sajan vegnidas rinforzadas las pretaisas per duvrar meds per proteger plantas. Products che sajan stads lubids avant 20 onns na sajan oz betg exnum anc adina adattads da vegnir lubids, hai num en la communicaziun.
Tge è il fungicid?
Avrir la boxSerrar la box
Chlorothalonil è la substanza che l’agricultura dovra gia dapi ils onns 70 sco fungicid. Mintg'onn vegnan sprizzadas circa 300 tonnas sin ils funs svizzers. Quai surtut per proteger la granezza da numerusas malsognas. Tar examinaziuns da l’aua sutterrana èsi vegnì mesirà valurs dal fungicid fitg autas.
Scumond aifer l'UE a partir dal 2020
Il mars passà aveva l’autoritad europeica per la segirezza alimentara per l’emprima giada fatg attent ch’ils products restants da chlorothalonil possian esser in privel per la sanadad. Sinaquai ha l’UE scumandà la substanza a partir dal 2020.
