Tip 1: Va ad in curs per emprender la lingua
Quai che tuna forsa l’emprim in zic stentus e da blera lavur, è la fin finala gnanc la mendra idea. En ina gruppa fa emprender savens dapli plaschair ed ins profitescha d’ina scolasta u in scolast che po direct respunder a Tias dumondas. Plinavant po quai er gidar a la motivaziun, perquai ch'ensemen fai adina dapli plaschair ed ins po profitar in da l'auter.
Tip 2: Tschertga in partenari da tandem
Er ina buna idea è da tschertgar in partenari da tandem. Quai vul dir ina persuna che discurra la lingua mamma che Ti vul emprender e che vul emprender Tia lingua mamma. Uschia profiteschan omaduas persunas dal barat. Sche Ti n’enconuschas betg uschè ina persuna, datti forsa en Tia scola u tar Tes lieu da lavur ina purschida. U in autra pussaivladad è da tschertgar online insatgi. Per quai datti er gia diversas plattafurmas nua ch'ins po s'annunziar.
Tip 3: Guarda serias/films u legia in cudesch en questa lingua
Cunzunt cura ch’ins cumenza ad emprender ina lingua, èsi impurtant dad udir questa. Perquai èn serias u films ideal per emprender. Là pon ins er metter en ils suttitels, uschia ch’ins po leger il medem mument e chapescha meglier tge che vegn discurrì. Plinavant èn er cudeschs in bun med d’emprender linguas; l’entschatta surtut cudeschs per uffants che cuntegnan in linguatg fitg simpel.
Tip 4: Emprender ina lingua cun agid d’ina app
Ozendi datti per tut apps, uschia er per emprender linguas. Là pon ins per regla dar en tge nivel ch’ins ha e po uschia ir tras questas lecziuns ch’èn savens vegnidas concepidas dad expertas ed experts da linguas. Quai è ina buna metoda per emprender er durant il viadi dad ir a scola u a lavurar.
Tip 5: Emprender la lingua en la regiun
Tgi ch’ha forsa in zic dapli temp (u er in zic dapli daners) po ir per in pèr emnas u er mais direct en ina regiun nua ch'ins discurra questa lingua en ina scola da lingua ad emprender. L’avantatg è ch’ins è sfurzà en il mintgadi da duvrar la lingua. Perquai che savens na san er las conscolaras ed ils conscolars betg rumantsch u tudestg.
Metodas per emprender fitg svelt ina lingua han ils dus coachs da l'Engalterra Michael e Matthew Youlden. Lez avevan gidà a Pascale Menzi, moderatura da l'emissiun da SRF «Puls» d'emprender rumantsch en be trais emnas: