Swissmedic ha approvà 41 medicaments cun novas substanzas activas, quai ha l'institut da medicaments communitgà. Ils pli blers novs medicaments, numnadamain 10, datti en il sectur da l'oncologia. Ils ulteriurs medicaments èn tranter auter per l'applicaziun en ils secturs da l’infecziologia e vaccinaziun, da l’endocrinologia e dal metabolissem sco er da la reumatologia e l’immunologia. La repartiziun da las lubientschas tenor secturs è cumparegliabla cun quella da l’onn avant.
Dals total 49 medicaments ch'èn vegnids examinads en l'onn 2023, han 84% survegnì l'admissiun da Swissmedic. Per ils ulteriurs medicaments èn las dumondas d'admissiun vegnidas retratgas da las firmas respectivas, tenor Swissmedic. Plinavant èn er 79 dumondas per duvrar tscherts medicaments per ulteriuras applicaziuns vegnidas examinadas tras Swissmedic. Da quellas èn 82% vegnidas approvadas.
