Dus schurnalists dal chantun Sviz èn vegnids undrads venderdi cun il «Swiss Press Award». Els han gudagnà il premi per ina contribuziun sur d'arbitrariadad tar discurs da natiralisaziun en la gasetta locala «Freier Schweizer», da Küsnacht. Ils dus schurnalists Matthias Niederberger e Fabian Duss han gudagnà il medem mument er en la categoria «schurnalissem local», sco che la Fondation Reinhardt von Graffenried ha fatg a savair venderdi suenter la surdada dal premi a Berna.
Il premi «Swiss Press Photographer of the Year» è ì a Dominic Nahr. El ha gudagnà en la categoria «Purtret» cun maletgs d’umans en la guerra en l’Ucraina ed en la categoria «Internaziunal» cun ina reportascha davart il terratrembel en ils culms dal Maroc il settember 2023. Tuttas duas serias èn vegnidas publitgadas en la «Neue Zürcher Zeitung».
-
Bild 1 von 4Legenda: Ils victurs dal «Swiss Press Award. Matthias Niederberger (sanester) e Fabian Duss. Keystone -
Bild 2 von 4Legenda: Dominic Nahr, victur dal «Swiss Press Photographer of the Year». Keystone
-
Bild 3 von 4Legenda: Tut ils schurnalists e las schurnalistas undrads, part 1... Fondation Reinhard von Graffenried
-
Bild 4 von 4Legenda: ... e part 2. Fondation Reinhard von Graffenried
Era dus Grischuns èn vegnids undrads: Stefanie Hablützel da Cuira è terza en la categoria schurnalissem local, per la reportascha dal monument naziunalsocialistic a Cuira. E Gian Ehrenzeller da Valens, fotograf tar Keystone-SDA, ha fatg il terz plaz en la categoria fotografias da sport, cun maletgs dal di da l'accident da Gino Mäder.
Ils victurs da las differentas categorias survegnan mintgamai 15'000 francs, il schurnalist ed il fotograf da l'onn 25'000 francs. La Fondation Reinhard von Graffenried è vegnida fundada cun la finamira da promover il schurnalissem svizzer.