Occurrenzas da sport u festivals da musica pli gronds collavuran per gronda part cun firmas da bigliets. Quellas administreschan e distribueschan ils bigliets e survegnan per la paja ina part da las entradas. La fundaziun per la protecziun da consuments crititgescha che la firma fusiunada avess bler memia bler possess. Organisaturs grischuns na partan betg questa tema.
Open Air Lumnezia
En il cas da l’Open Air Lumnezia èn quai radund 10% pertschient da las entradas da bigliets ch’els han da dar giu. Norbert Cavegn, president da l’Open Air Lumnezia, n'ha betg tema che questas cundiziuns pudessan daventar pli severas cun ina fusiun. La fin finala sajan organisaturs e firmas da bigliets dependents d’ina buna collavuraziun. Era organisaturs na veglian e possian betg laschar tiers mintga cundiziun da contract. Norbert Cavegn vesess la fusiun schizunt sco pass positiv. Cun ina gronda firma possian ins cuntanscher bler dapli persunas.
Campiunadi mundial 2017 a San Murezzan
Sumegliant vesa era Thomas Morand quai dal comité d’organisaziun dal Campiunadi Mundial 2017 a San Murezzan. Els lavura gia blers onns ensemen cun Ticketcorner. Actualmain han els in contract che vala er gist anc per las cursas da cuppa mundiala da las dunnas dals proxims tschintg onns. Els hajan da dar giu in pèr pertschient da las entradas da bigliets a Ticketcorner. Che questa part pudess explodir en il futur na craja Thomas Morand però insumma betg. Els sco organisaturs sajan dependents d’in pretsch da bigliets moderà che giaja a prà cun lur finanzas.
RR actualitad bunura 06:00