- Il stemprà «Uwe» ha chaschunà aura burascusa durant la dumengia.
- Ina front fraida ha emprim purtà ferms vents e la saira ina sfradentada.
- En las muntognas en il Vest en vegnids mesirads suffels da stemprà enfin 130 km/h.
- En la Bassa èn polizia e pumpiers stads en acziun gronda.
Ils ferms vents da la front fraida han per part laschà enavos gronds donns, quai surtut en il chantun Son Gagl. Qua ha il stemprà donnegià tetgs da radund 20 chasas. Duas da las chasas na sajan betg pli abitablas. Quai tenor rapports da la polizia chantunala. La dimensiun exacta dal stemprà na saja però anc betg clera. Pervia dals ferms vents han er 14 sgols a l'eroport da Basilea stuì vegnir annulads. En ils chantuns Berna, Basilea e Solothurn èn ils pumpiers stads en acziun pervia da plantas cupitgadas.
En il Grischun percunter n'èn nagins donns vegnids annunziads. Quai ha confermà la polizia chantunala dil Grischun sin dumonda da RTR.
RR Novitads 06:00