Tenor il president tirc Recep Tayyip Erdogan èn numnadamain ils adherents dal spiritual Fethullah Gülen responsabels per il putsch da l'emna passada. Vegn ussa era fatg «chatscha» d'adherents da Gülen en Svizra?
Dovra dumonda d'assistenza
Tenor l’uffizi per giustizia svizzer n’han las autoritads tircas betg il dretg d'arrestar u d'interrogar sez en chaussa sin territori svizzer. «Sch'in stadi dovra infurmaziuns davart ina persuna en Svizra, u sch’el vul perfin arrestar ella, sto el far ina dumonda d'assistenza giudiziala a nus», di Ingrid Ryser da l’Uffizi federal da giustia. E qua stoppia il delict per il qual la persuna saja accusada, er esser renconuschì sco in delict en Svizra.
Nagin sustegn per acziuns motivadas politicamain
E gia qua èn las opiniuns divididas. Il moviment Gülen vala numnadamain en Tirchia dapi in onn sco organisaziun terroristica, en Svizra betg. Ed Ingrid Ryser da l’Uffizi federal da giustia intunescha: «La Svizra na dà betg agid giudizial per acziuns ch’èn motivadas politicamain or da punct da vista dal uffizi per giustia.»