Ils chantuns da muntogna e las vischnancas da concessiun han spetgà cun brama sin questa sessiun. Il parlament ha numnadamain decis davart ils tschains d’aua. Sin maisa era la proposta da sbassar quels da 110 francs sin 80 francs per kilowatt prestaziun brutta.
I gieva per var 550 milliuns francs tschains d’aua ch'ils concerns d’electricitad pajan als chantuns ed a las vischnancas da concessiun per pudair producir electricitad cun l‘aua da lur flums.
Cun ina reducziun dals tschains d'aua perdess il Grischun passa 30 milliuns francs mintg'onn. Ma il lobbying da las vischnancas da concessiun e dals chantuns da muntogna ha gidà. Il parlament ha decis a lur favur ed ils tschains restan tar 110 francs.
La decisiun è dentant sulettamain ina soluziun intermediara. Davent da l'onn 2025 stoi dar ina nova regulaziun.
L'ensaina da las elecziuns
Il Cussegl naziunal sbittà l'augment da la franschisa per 50 francs en las votaziuns finalas. Anc avant duas emnas aveva la chombra gronda dà glisch verda al project.
Igl è la decisiun surprendenta da la PPS che ha manà tar il NA. Ensemen cun las partidas sanestras ha la partida populara tramess l'augment da l'aua gì. Dentant era la PCD ha anc reagì auter che avant duas emnas. La gronda part da la partida ha numnadamain s'abstegnì da la vusch.
Cun questa decisiun po la PPS evitar che la PS po far ina campagna d'elecziun cun il referendum che fiss stà previs. Fatgs che han procura questa bun’ura per renfatschas tranter las partidas. Renfatschas ch'èn vegnidas fatgas da tuttas varts.
Quai mussa che las elecziuns da l'october han gia in'influenza sin las decisiuns che vegnan tutgadas. Fiss vegnì vuschà in auter mument sur da la franschisa avess il resultat segir guardà ora auter e partidas che eran adina d'accord cun l'augment n'avessan era betg midà lur opiniun en las davosas minutas.
Parlament generus
Quai ch'era è questa sessiun d'observar è ch'il parlament era fitg generus. Uschè ha per exempel il Cussegl naziunal dà ora ina milliarda dapli che quai ch'il Cussegl naziunal aveva proponì per la construcziun da vias.
Ins po pia dir, sche i na fiss betg in onn d'elecziuns, na fiss il parlament betg stà uschè generus. Ed ils augments dal budget procurà per pli grondas debattas.
RR actualitad 12:30