Per il post sco president dal Cussegl naziunal vegn cun gronda probabilitad il Friburgais Dominique de Bumann elegì. El sesa sco politicher da la PCD gia 14 onns en il Cussegl naziunal.
Candidata per surprender il timun dal Cussegl dals chantuns è Karin Keller-Sutter da la PLD. Ses onn presidial pudess dentant prender ina vieuta nunspetgada: La parlamentaria da Son Gagl vala numnadamain sco successura favurita per cusseglier federal Johann Schneider-Ammann.
442 milliuns francs libers
Suenter las elecziuns presidenzialas sa deditgeschan ils cussegls quest'emna al budget per il 2018. In tema èn per franc ils 442 milliuns francs disponibels entras il «na» tar la refurma da rentas. Enfin la davosa emna da la sessiun ston il parlament esser perina davart il preventiv 2018. Savens è per quai ina conferenza da cunvegnientscha da basegns.
Iniziativas d'agricultura e velo
Tema durant la sessiun d'enviern èn era duas iniziativas dal pievel. Il Cussegl naziunal tracta l'iniziativa «per la suveranitad alimentara». Quella vul promover l'agricultura persistenta e scumandar ni far pli char imports da products che na van betg a prà cun las finamiras da persistenza da la Svizra.
Ed il Cussegl dals chantuns prenda nauadora il velo. L'iniziativa da velo vul promover l'ir cun velo. Quai cun dar a la Confederaziun la pussaivladad da sustegnair la construcziun da vias da velo.
RR novitads 11:00