La retschertga da la gasetta mussa: il minus a la bursa n’ha betg tutgà ils ritgs. Il possess total da 821 milliardas francs è sa sminuì minimalmain dapi il 2021 per 0,1%. Il Swiss Market Index SMI è dafertant sa reducì per 16%.
Ils Blochers perdan 5 milliardas
En cas singuls èn las famiglias ed ils possessurs e las possessuras bainstantas bain pertutgadas da la situaziun economica. Cun la EMS e la Dottikon ES posseda la famiglia Blocher duas interpresas a la bursa. Cunquai che quellas han pers a la bursa, perdan era ils Blochers, en tut circa 5 milliardas francs. Els possedan dentant anc adina 14 fin 15 milliardas francs.
Er la famiglia Schindler e Bonnard, che posseda il fabritgader da lifts Schindler, han fatg ina perdita da 7 milliardas francs. Els han uss anc 9 fin 10 milliardas tenor la gasetta.
Dapi il 1989 han ils ritgs quatter giadas uschè blers daners
Per ch’ils ritgs e las ritgas na fan sut il stritg betg in minus, ston auters far gudogn, e quai è il cas: La famiglia Aponte ch’è involvida en il transport naval global fa in gudogn da 11 milliardas francs. Suenter la pandemia sajan las marschas en la fatschenta creschidas fermamain. Er cun la branscha da luxus vai bain: Gérard ed Alain Wertheimer, ils possessurs da Chanel, han dapi l’onn passà anc ina giada fatg 9 milliardas francs dapli.
La «Bilanz» ha fatg la retschertga l’emprima giada 1989. Da lez temp han ils 100 pli ritgs gì ensemen 66 milliardas. Uss, suenter 23 onns, èn ils possess totals dals 100 pli ritgs gia 4 giadas uschè gronds.
Bunamain la mesadad da las 300 persunas las pli ritgas en Svizra èn da l’exteriur e nizzegian las bunas cundiziuns da taglia en Svizra.