Il senat talian, cun 120 commembers preschents, ha unanimamain ditg Gea a la nova cunvegna da cunfinaris tranter la Svizra e l'Italia. L'intent principal da la cunvegna è d'evitar in'imposiziun dubla da taglia.
Uschia duai la Svizra salvar en l'avegnir 80% da las taglias a la funtauna che vegnan incassadas sin la paja da cunfinarias e cunfinaris talians. Ils cunfinaris che cumenzan lur lavur suenter che la cunvegna va en vigur duain vegnir suttamess a la taglia ordinaria er en il stadi da domicil ch'ha lura d'evitar in'imposiziun dubla da taglia.
La chombra dals deputads taliana aveva gia ditg Gea l'entschatta matg. Cun la decisiun dal parlament talian vegn la Svizra er stritgada da la glista naira dals paradis da taglia.
Var 77'000 lavurantas e lavurants talians traversan mintga di il cunfin svizzer en direcziun Tessin. La gronda part dad els vegn da la Lumbardia.
