Gilles Marchand è succedì l'emprim d’october a Roger de Weck sco directur general da la SRG/SSR. Il venderdi ha el preschentà las prioritads per sia lavur ed il team cun il qual ch'el vul realisar quellas sfidas.
Dialog constructiv ed avert cun il public
Gilles Marchand (54), l'anteriur directur da Radio Télévision Suisse (RTS), ha suttastritgà sia prontezza ad in dialog avert e constructiv – tant cun las ulteriuras medias sco er cun il public. El sa saja conscient da la gronda sfida, ha ditg Marchand envers las medias:
Ensemen cun mias e mes collegas en las regiuns ed a Berna vegn jau a m’engaschar plainamain per l’avegnir dal service public, perquai che jau sun persvadì da si’impurtanza per noss pajais.
Perquai vul Gilles Marchand porscher vinavant programs excellents en tut las quatter linguas uffizialas, segirar la professiunalitad e l'independenza da las redacziuns, promover la midada digitala en la SSR, mantegnair il contact cun il public giuven e cuntinuar dad investir en la cultura.
5 projects da cooperaziun concrets
En ses discurs a las medias ha il directur general intunà, quant difficila che la situaziun per las chasas da medias privatas saja en vista al tempo da la digitalisaziun. Perquai valia uss da promover la cooperaziun. Quai vul Gilles Marchand far cun tschintg projects concrets.
Il team da Marchand
Ensemen cun la nominaziun sco substituta ha il directur general er surdà a Ladina Heimgartner il dossier «medias e societad» per tut la SRG SSR.
La finamira haja dad esser, dad accumplir anc meglier l'incumbensa, che la SSR haja survegnì da la societad:
En il temp dad oz vul quai er dir, che nus vegnin pli avert e pli dinamic, che nus tschertgain pli ferm il dialog cun la societad e tadlain attentamain.
La SRG SSR vegnia a s’engaschar en il futur anc pli sapientivamain ed activamain sco actura relevanta per la societad Svizra, ella vegnia a crear anc dapli plivalur ed era a communitgar quai da moda adattada e regulara, ha Marchand circumscrit quest dossier.
Direcziun «Svilup e purschida» a partir dal 2018
En sia lavur survegn la direcziun da la SSR SRG sustegn dad ina persuna nova: Bakel Walden (42) surprenda la partiziun nova «Svilup e purschida» che unescha la coordinaziun da program, la transfurmaziun digitala, la perscrutaziun dal martgà e dal public ed il barat internaziunal.
Walden mida da la strategia da program SRF en la direcziun generala.
Midadas er tar la «Chadaina da Fortuna»
La «Chadaina da Fortuna» survegn in nov president. Cun la fin da l’onn remetta Ladina Heimgartner il mandat da presidenta. Sco successur ha nominà il nov directur da la SRG/SSR a Pascal Crittin, ch’è directur dad RTS.
RR novitads 11:00++