La gruppa da medias da la NZZ ha fatg l’emprima mesadad da l’onn in gudogn da bunamain 13 milliuns francs. Cumpareglià cun la medema perioda da l’onn passà è quai in plus da 7%. Dentant è la svieuta sa reducida per 3% sin 211 milliuns francs.
Las entradas da reclama sajan sa reducidas anc pli fitg che spetgà, numnadamain per 11%. Quai ha communitgà la gruppa da medias da la NZZ. Pli cuntentaivlas sajan las entradas dal martgà da lecturs e nizzegiaders. Restadas stabilas èn las entradas ord abunaments, vendita singula, occurrenzas u autras fatschentas. La segunda mesadad da l’onn vul la gruppa investir dapli en novas ed optimadas purschidas.
