La prefecta Stéphanie Niederhauser haja acceptà uschia differents recurs cunter la votaziun dals 18 da zercladur 2017. Ella communitgescha dad avair resguardà tar sia decisiun en emprima lingia il sa cuntegnair da la vischnanca da Moutier e ses president durant il cumbat da votaziun.
Questa decisiun ha procurà per discussiuns intensivas.
Las reacziuns sin l'annullaziun da la votaziun
- Las autoritads da Moutier discurran dad «ina vargugna».
- Per la regenza chantunala dal Giura saja l’annullaziun ina decisiun motivada politicamain: «Quai è in di nair per Moutier ed il Giura». Quai ha il president da regenza David Eray ditg il glindesdi davant las medias. La decisiun na saja betg chapibla. La votaziun dals 18 da zercladur 2017 saja stada ina da las pli survegliadas en l’istorgia, citescha l’agentura da novitads SDA el.
- La regenza bernaisa na vul il mument betg contractar davart ina midada da Moutier tar il chantun Giura. Uss saja la giustia vidlonder, scriva la regenza en ina communicaziun. Il sistem giuridic lubeschia da far recurs cunter la decisiun da l'administratura regiunala dal chantun Berna. Quai vegnia respectà. Ins saja consternì ch'i haja dà irregularitads ed in sa cuntegnair nundemocratic durant la votaziun.
- En in'emprima reacziun ha la Cussegliera federala Simonetta Sommaruga appellà a la regiun da Moutier da restar quieta. Avant che trair las consequenzas politicas e giuridicas stoppian ins anc spetgar sch'i dettia recurs cunter la decisiun. Il proxim mais veglia Sommaruga examinar a moda approfundada la decisiun da la substituta da la regenza dal Giura bernais.
La prefecta dal chantun Berna, l'administratura regiunala dal Giura bernais, argumentescha, che las autoritads hajan fatg propaganda empè dad infurmar.
Infurmar, betg far propaganda
Las autoritads hajan bain il dretg da prender ina posiziun avant ina tala votaziun – ella haja dentant da far quai cun mesira, objectiv e transparent. Quai che saja vegnì fatg en il cas concret correspundia a propaganda betg acceptabla.
Quest punct sulet avess basti per declerar nun valaivla ina votaziun. En il cas concret haja quai dà anc autras irregularitads. Summa summarum na possia vegnir exclus, che la votaziun fiss vegnida or auter senza tut questas irregularitads.
Avert, sche Moutier votescha anc ina giada
Uschia han ils da Moutier forsa anc ina giada da decider sche lur citad duai far part dal chantun Giura enstagl da quel da Berna. Quai ha ditg Pierre-André Comte, il secretari general dal «Mouvement autonomiste jurassien» envers las medias.
La decisiun da l’onn passà per midar chantun è stada stretga. Igl è da far quint ch’ils autonomists tirian vinavant l’annullaziun da la votaziun.
![In auto da polizia bernais avant la chasa communala da Moutier.](https://www.rtr.ch/static/cms/images/960w/a35365.jpg)
RR novitads 10:00+