Il manaschi da la gronda part da las 1'400 lingias regiunalas na cuvran betg ils custs. Passagiers pajan en media var la mesadad dals custs. Custs betg cuvrids indemniseschian Confederaziun e chantuns cun var duas milliardas francs: la mesadad dals custs surpiglia la Confederaziun.
CFF cusseglia midada
L'Uffizi federal per traffic stoppia segirar ch’interpresas da transport (purschiders da prestaziuns) inditgeschian a chantuns e Confederaziun (empustaders da quellas) correct las valurs da traffic da persunas regiunal, independent da la direcziun. Ils trics da subvenziun tar l'AutoDaPosta hajan mussà che las revisiuns da quint actualas percorschian betg cugliunaria u lura memia tard. La Controlla da finanzas federala CFF cusseglia ina correctura.
Spargnar cun standardisar
Plinavant è la controlla da finanzas da l'avis ch'ins pudess spargnar custs, sch'il material rullant vegniss standardisà. Almain duessan trens ad autotracziun da differents constructurs pudair vegnir colliads in cun l'auter.
RR novitads 06:00