Durant la pandemia han las Svizras ed ils Svizzers cumprà dapli en l’agen pajais. Il commerzi en detagl, la mastergnanza ed ils producents svizzers vulan profitar da quest effect e lantschan la campagna «Shopp Schwiiz».
Studis mussian che las consumentas ed ils consuments en Svizra cumprian pli savens products regiunals e che la qualitad, la persistenza ed la disponibilitad ed il gudogn da temps gioghian ina rolla pli gronda ch’avant la pandemia. Fitg tschertgadas sajan per exempel stadas las stizuns da bains purils ed era il turissem da cumpra en l’exteriur, che fascheva ora avant la crisa tranter nov ed indesch milliardas francs, saja sa sminuids.
L’Uniun svizra d’artisanadi e mastergn sco era la Federaziun dal commerzi en detagl e l’organisaziun da marketing da l’agricultura svizra vulan perquai nizzegiar la chaschun e lantschan perquai la campagna «Shopp Schwiiz! Qua viv - qua cumprel». Cun placats e reclamas sin las plattafurmas socialas vulan els motivar la populaziun da far cumissiuns en Svizra.
