Dapi il 1985 saja la surfatscha da terren abità ordaifer las zonas da construcziun creschida per l'entira surfatscha da las citads da Turitg, Genevra, Basilea e Berna scriva la Pro Natura.
Las surfatschas dad edifizis e da traffic sajan creschidas en il medem temp dadens e dador las zonas da construcziun medem fermamain – numnadamain 32% tar ils edifizis e 15% tar il traffic.
Er agricultura dovra pli e pli terren
Remartgabel tenor la Pro Natura saja, che l’agricultura sez è stada da la partida tar quest svilup: In terz da la creschientscha da las surfatschas dad edifizis sin pajais da cultura va sin il conto da l’agricultura. Tranter il 1985 ed il 2009 è il areal dad edifizi per bain puril s’augmentà strusch per il dubel – numnadamain da 0,23 sin 0,43 hectaras.
Excepziuns èn basa per «miseria da la cuntrada»
La raschun per questa «miseria da la cuntrada» sajan las bleras excepziuns ch'èn vegnidas integradas en la lescha per la planisaziun dal territori. La confederaziun vul anc quest onn reglar da nov la construcziun ordaifer la zona da bajegiar.
Tenor la Pro Natura sto quella franar consequentamain il boom da construcziun en la cuntrada.
RR novitads 15:00