L'augment en il vast portfolio da devisas fa ora 19 milliardas francs da las 24 milliardas gudogn. La banca naziunala cumpra regularmain euros u dollars per uschia flaivlentar il franc e sustegnair l'economia. Quests daners investescha ella en aczias u emprests e vala entant sco in dals impurtants investiders a la «Wall Street».
Ils possessurs da la Banca naziunala duain survegnir ina dividenda da 15 francs per aczia. A Confederaziun e chantuns van plinavant 1,5 milliardas francs. 24 milliuns da quai van al chantun Grischun, sco quai che Barbara Janom-Steiner ha confermà ad RTR. Quai èn 8 milliuns francs dapli che quintà. E quels daners van el budget da l’onn 2017. Uschia sappia il deficit dal chantun vegnir sminuids da 20 milliuns sin 12 milliuns francs.
Cun ina part dal gudogn vul la BNS stabilir il spazi en cas da sperditas pli grondas. Il 2015 aveva la Banca naziunala numnadamain anc scrit ina sperdita da record da bun 23,3 milliardas francs.
Il rapport detaglià per la finiziun da l'onn 2016 cun las cifras definitivas suonda ils 6 da mars. Il rapport da gestiun vegnia lura publitgà ils 23 da mars.
RR novitads 08:00