In di suenter las elecziuns ha il Cussegl federal decidì davart la repartiziun dals departaments. Il nov elegì Beat Jans surpiglia surprendentamain il Departament federal da giustia dad Elisabeth Baume-Schneider. Il Departament da l'intern che vegn liber dal cusseglier federal partent Alain Berset surpiglia Elisabeth Baume-Schneider. Tut tschels cussegliers federals restan en lur departament, sco quai che la chanzlia federala communitgescha.
Quai è ina buna nova per la PS. Perquai che uschia resta l’impurtant departament federal da l’intern (EDI) en ils mauns dals socialdemocrats. Surprendent è dentant che la cussegliera federala Baume-Schneider dat giu il Departament federal da giustia e polizia suenter mo in onn. Enstagl sto il nov elegì Jans sa fatschentar a partir da l'onn che vegn cun il dossier d'asil difficil.
Era Baume-Schneider è dumandada
Dentant per Baume-Schneider na vegni betg a dar incumbensas main difficilas. Ella vegn gist ad avair plirs cumbats da votaziun pli difficils. Ils 3 da mars vegn tant l’iniziativa da renta dals giuvens liberals sco l’iniziativa per ina 13avla renta d’AVS da la sanestra a l’urna.
Pli tard l’onn vegn votà davart l’iniziativa per premias pli bassas da la PS, l’iniziativa per franar ils custs da la partida dal center sco era davart l’iniziativa «Per la libertad e l'integritad corporala». Betg sco ultim ha lieu il cumbat da votaziun per la refurma da la segunda pitga da la prevenziun professiunala (BVG).
En il cas da la refurma BVG, la 13avla renta da l'AVS sco era l'iniziativa per distgargiar las premias vegn la nova ministra da l'intern a stuair sa metter cunter l'atgna partida. Era sper tut quai na dastgass Baume-Schneider betg avair memia pauca lavur. En il dossier da sanadad vai per exempel per la realisaziun da l'iniziativa da tgira, l'elavuraziun da la lescha d'epidemias revedida u l'offensiva da digitalisaziun.
