Adina esser cuntanschibel, la communicaziun cun las docentas e cun ils students, mantegnair la qualitad da la scolaziun ed empruvar da sminuir la stancladad da la pandemia – quai sajan las grondas sfidas da la Scol’auta spezialisada dal Grischun FHGR, di il rectur Jürg Kessler.
Perquai saja il barat cun las studentas ed ils students, sco era las docentas ed ils docents, fitg impurtants. Ils resuns sin quai barat sajan buns e las studentas sa sentian prendidas seriusas, di tranter auter Larissa Cathomen che ha l’atun passà entschet a studegiar a la FHGR.
Mintga classa ha in pledader da classa e lezs han mintga mais, ensemen cun il manader dal studi, ina sesida nua ch’i vegn discutà co i va cun las scolaras ed ils scolars e tge ch’ins pudess meglierar. E quai vegn il pli empruvà da realisar.
La qualitad da la scolaziun
Jürg Kessler di, ch’i saja fitg impurtant a la FHGR che las lecziuns virtualas èn autras che las lecziuns cun preschientscha fisica. Las docentas ed ils docents duain far diever dals utensils digitals ed adattar las lecziuns uschia ch’ellas èn optimalas per online. Fabio Tuor che studegia a la FHGR di, ch’el sentia in svilup da qualitad da las lecziuns.
Ils docents emprovan da duvrar utensils interactivs, che jau na giaschia betg mo en mia sutga da biro e taidlel tiers, mabain che jau poi era ma participar.
Sfidas ord la vista d’ina studenta ed in student
Il mintgadi da las studentas ed ils students saja il davos onn daventà fitg monoton, di Gianna Bearth che studegia medischina a l’Universitad da Friburg.
Jau crai il pli grev è il mument da restar motivada en il studi. Pertge ti fas mintga di il medem: Ti levas, avras il computer e miras en quel quatter uras. Quai n’è betg fitg interessant, perquai che ti n'has betg il contact social sco uschiglio.
Bibliotecas avertas
Il grond cletg da bleras studentas e blers students saja stà, che las bibliotecas hajan gì avert, dian Gianna Bearth e Leander Etter che studegia giurisprudenza a l’Universitad da Turitg. Els dus han stimà fitg, dad almain uschia vesair ils commilitons e las commilitonas.
Examens
Sper la mancanza da contacts socials, èn era ils examens in grond tema. Tgi ha els online, tgi a l’universitad e tar auters vegnan els spustads.
Uschia ha Leander Etter gì l'onn passà ses examens pir la fin da la stad enstagl l’entschatta da l'onn. Quai munta ch'el ha gì d’entschaiver ses nov semester senza savair sch'el ha insumma dumagnà il davos onn.
Tar las studentas da medischina a Friburg, è l'examen da l’enviern vegnì spustà ord diversas raschuns spontanamain sin la stad. Quai munta ch'ellas han uss emprendì per in examen che ha lieu pir en in mez onn, e vitiers han ellas dubel uschè blers examens la stad, declera la Sursilvana.
Schluccadas
Davent da glindesdi dastgan las universitads puspè far las prelecziuns en preschientscha, simplamain cun in dumber da students limità. Singulas universitads, sco quella da Friburg, fan per il mument dentant vinavant tut online.