Il trend da plirs onns cuntinuescha: Svizras e Svizzers han er l’onn passà fatg damain diever da televisiun e da radio. Quai ha communitgà l’Uffizi federal da statistica. Cumpareglià cun l’onn precedent saja vegnì guardà en media nov minutas per di damain televisiun, la media svizra è stada tar 111 minutas. Dentant dettia grondas differenzas tranter las regiuns linguisticas. Uschia han persunas da la Svizra taliana guardà en media 146 minutas il di, en la Romandie èn quai stadas 123 minutas entant ch'ils da la Svizra tudestga han be guardà 104 minutas televisiun il di.
Er damain Radio
Er l'utilisaziun dal radio è tschessanta dapi il 2010. L'onn passà è ella sa reducida per ses minutas. Tranter las differentas vegliadetgnas datti grondas differenzas, las persunas sur 60 taidlan 5,2 giadas dapli radio ch'ils da 15 fin 29 onns.
