Gia a Turitg a la staziun pon ins distinguer ils «Swifties», ils fans da la chantadura Taylor Swift, sin lur via al stadion da Letzigrund. Els tuts portan vestgadira glischanta, bratschlets colurads e chalzers da cowboy. Il superstar è per l'emprima giada en Svizra, ed ils fans na sa laschan betg fermar da la chalira u dals trams plains.
Ils fans stattan gia bleras uras davant il stadion, schebain che las entradas avran pir pli tard. Tranter els èn era fans rumantschs. Era per els èsi in grond siemi da vesair la chantadura sin tribuna.
«Jau taidl gia dapi che jau sun in uffant sia musica», raquinta in dals fans davant il stadion. Ella e sias amias spetgan gia dapi uras, fin che las entradas s'avran.
Per persunas ordaifer quest «univers» da Taylor Swift, po quai esser nunchapibel, co ins sa esser uschè in grond fan dad insatgi. Ils «Swifties» han dantant ina clera explicaziun.
Ella ans dat simplamain il sentiment d'esser ina da nus.
Ella saja talentada ed ama ses fans, dian els. Ina gronda part da ses success è en quest cas il contact cun ils fans. Quai fa ella en differentas modas e manieras, quintan ils Swifties. Ella haja pli baud perfin envidà fans en sia chasa, per tadlar l'album nov.
La mesemna saira èn 48'000 persunas en il stadion da Letzigrund a Turitg – e la chantadura na spargna betg cun las shows, ella chanta trais uras e mez, senza pausa. Quai fa plaschair als fans, ma els fan era patratgs da stuair star en pe uschè ditg.
Punctualmain a las quatter e mesa s'avran las portas, e la massa sa mova vers il stadion. Plain plaschair anticipà van els in davos l'auter en il stadion.