17,4 milliuns pernottaziuns durant la stagiun d'enviern – uschè bleras n'ha l'hotellaria svizra anc mai registrà. En congual cun la medema stagiun da l'onn passà èn quai in augment da 18% u 2,7 milliuns pernottaziuns. Surtut la dumonda da pajais esters saja creschida (+42,6%), scriva l'Uffizi federal da statistica. Er Svizzers e Svizras han dentant pernottà tant sco anc mai en hotels cun 9,3 milliuns notgs.
Main pernottaziuns en il Grischun
En cuntrast cun tut la Svizra ha l'hotellaria grischuna nudà damain pernottaziuns la stagiun d'enviern. Cumpareglià cun l'ultima stagiun è il dumber sa reducì per 2,7%. Da las grondas regiuns ha be l'Engiadina/San Murezzan registrà levamain dapli pernottaziuns che l'onn avant. Il pli grond minus noda la destinaziun da Bregaglia Engiadina cun prest 32% damain pernottaziuns.
Las 288'798 pernottaziuns en tut il chantun èn malgrà il minus en congual cun l'onn avant anc adina 9,3% sur la media dals ultims tschintg onns.
Or da l'archiv
La stagiun d'enviern durant la pandemia
