Stadler Rail - Ina uschè gronda empustaziun sco anc mai
Stadler Rail ha survegnì la pli gronda empustaziun en l’istorgia dal concern. La firma po furnir passa 500 vehichels ad in consorzi da pliras interpresas da transport en l’Austria ed en la Germania. Inclus è er il mantegniment sur decennis.
Ils vehichels pon tant cursar sco trams sco er per viadis pli lungs. Tut tenor nua ch’ils vaguns servan, han els indrizs individuals, sco Stadler Rail scriva.
Legenda:
Citylink è in tram che las interpresas da transport pon tut tenor basegn era duvrar sco tren per pli lungas distanzas.
MAD, Stadler Rail
Il volumen total da l’empustaziun munta fin a quatter milliardas euros. Il contract general cumpiglia er il mantegniment dals vehichels per ils proxims 32 onns. Fix èn empustads 246 vehichels, las interpresas da transport han ultra da quai fixà l’opziun per ulteriurs 258 vehichels. Ils emprims quatter trams e trens cumbinads vul Stadler Rail furnir il 2024.
