Acts sexuals cun animals vegnan numnads «Sodomia» u Zoofilia. Ina persuna che fa quai è in «Sodomit». Oriundamain muntava quai che la persuna cuntrafa a la morala sexuala, è omosexual u ha gugent buobs.
L'expressiun deriva da la citad da Sodom. Tenor la Bibla cuntrafaschevan ils abitants ed abitantas a questas moralas sexualas.
Quant derasà ch'il fenomen è, è grev da giuditgar, cunquai ch'i na dat strusch cifras verdaivlas. Tenor in vegl studi american, il rapport da Kinsey, hajan radund 8% da tut ils umens e passa 3% da las dunnas fatg almain in'experientscha zoofilia en la vita. En regiuns ruralas sajan quai schizunt 17% da la populaziun. Il pli savens èn pertutgads ils chauns. Tenor in rapport da la Fundaziun per l'animal a dretg sajan las cifras bain veglias, i na dettia dentant nagins indizis ch'i saja ozendi fitg auter.
Il rapport da Kinsey
Avrir la boxSerrar la box
Dus cudeschs dal zoolog e perscrutader da la sexualitad Alfred Charles Kinsey èn la basa per las bleras cifras pertutgant zoofilia. El ha publitgà quests ils onns 1948 respectivamain 1953. Els cuntegnan betg mo la zoofilia mabain èn in rapport general sur da la sexualitad da l'uman.
Kinsey ha evaluà radund 11'000 intervistas anonimas cun tranter 300 e 500 dumondas. Sa participads èn 5'300 umens e 5'940 dunnas, da tut las vegliadetgnas, religiuns, scolaziuns e territoris dals Stadis Unids da l'America.
Acts sexuals cun animals èn dapi 2008 explicitamain scumandads en Svizra, avant era be la producziun, derasaziun ed il possess da material pornografic cun animals scumandà. I pudeva vegnì argumentà cun tortura d'animals, perquai stueva dentant vegnir mussà che l'animal è vegnì maltractà, quai ch'era grev. Cun il nov dretg da protecziun dals animals è l'act sexual sez vegnì scumandà, independent dal fatg sch'il animal ha patì corporalmain.
Punct da vista giuridic
Avrir la boxSerrar la box
Acts sexuals cun animals èn scumandads tenor artitgel 16 da l'Ordinaziun da la protecziun dals animals. Els vegnan chastià sco cuntravenziun a la dignitad da l'animal tenor artitgel 26 da la Lescha per la protecziun dals animals, sco tortura d'animals – independentamain dal fatg sche l'animal patescha u betg.
I dat fin a trais onns praschun u in chasti pecuniar.
Il medem chasti datti per la producziun e derasaziun da products pornografics. Per il possess u la cumpra datti fin ad in on praschun u in chasti pecuniar.
