Firmas svizras na sa tegnian betg pli enavos sch'i va per auzar ils pretschs. Quai ha ditg Thomas Jordan il schef da la banca naziunala svizra a chaschun dad in discurs da podi da las bancas centralas a Wyoming en ils Stadis Unids. Datas vegnian a mussar ch'interpresas han adattà ils ultims mais lur politica da pretschs a la rata d'inflaziun ch'è creschida. La cumpart da la rauba e servetschs cun pretschs che creschan è s'augmentada. A medem temp è la cumpart cun pretschs che sa reduceschan restada constanta.
SNB sa tegn vi da finamira d'inflaziun
La Banca naziunala svizra sa tegn vi da sia finamira d'inflaziun, ha ditg Thomas Jordan a l'inscunter da las bancas centralas. Per la banca naziunala è la stabilitad dals pretschs garantida uschè ditg che la chareschia sa mova sin tranter 0% e 2%. El è da l'avis che questa definiziun da la stabilitad è er sa cumprovada sut las grevas circumstanza dals ultims 15 onns. Il mument è l'inflaziun tar 3,2%. Perquai aveva la banca auzà ils tschains per in mez punct da pertschient il zercladur.