Avant quatter onns eran ils Verds ils gronds victurs da las elecziuns. Tar las elecziuns dals 22 d'october guardi probablamain ora auter. Tenor l'ultima retschertga da Sotomo avant las elecziuns pudessan els puspè perder passa la mesadad da lur gudogns d'avant quatter onns. Cun 9,7%, in minus da 3,5 puncts procentuals en congual cun il 2019, pudessan ils Verds puspè crudar sut ils 10%. Er la Partida verd-liberala perda tenor la retschertga (-1 punct procentual). Era sche questas duas partidas na rivan probablamain betg da tegnair la cumpart d'electuras ed electurs ch'ellas han gudagnà avant quatter onns, restass quai tuttina il segund meglier resultat en lur istorgia.
PPS e PS cun schlantsch
Tut auter guardi ora tar las dus partidas ch'han pers vuschs il 2019. Il trend che la PPS vegn pli ferma vegn er confermà en la pli nova retschertga. Cun 28,1% fiss la partida da dretga anc 1,3 puncts procentuals sut ses meglier resultat da l'istorgia dal 2015.
Er da l'autra vart dal spectrum politic datti in plus. En il barometer registrescha la PS in augment da 1,5 puncts procentuals. Cun quai fiss la segund gronda partida buna da cumpensar var trais quarts da la perdita dal 2019. In factur per l'augment pudess esser l'annunzia che las premias da la cassas da malsauns creschan puspè l'onn che vegn, declera il rapport dal barometer. Sco che l'analisa mussa, profita la PS da persunas ch'han votà il 2019 per ils Verds. Ils Verds perdan 1,8 puncts procentuals a la PS.
Cumbat per plazza trais
La cursa tranter la PLD e l'AdC per la plazza sco la terz pli gronda partida resta vinavant ordvart stgarsa. Tranter la Partida liberaldemocratica e l'Allianza dal Center èn numnadamain be 0,2 puncts procentuals. Quai vul dir ch'i n'è insumma betg cler tgi che vegn ad esser sin il terz plaz tar las elecziuns. La dumonda dal terz plaz è ina dumonda spezialmain impurtanta sch'i va per la cumposiziun dal Cussegl federal. Las trais partidas las pli fermas han tradiziunalmain mintgamai dus sezs en il Cussegl federal.
Premias da las cassas da malsauns fatschentan adina pli fitg
Tar la glista da las sfidas han las premias da la cassas da malsauns en il barometer da settember stgatschà la midada dal clima sco sfida dumber in. Quest trend ha cuntinuà en maniera fitg marcanta en l'october. Gista 51% han numnà la premias sco la sfida la pli impurtanta en la Svizra. En settember eran quai anc 39%. Er per la decisiun a l'urna èn las premias nov il tema il pli impurtant. Sin plaz dus resta la midada dal clima curt davant l'immigraziun.