- En il chantun Vad hai dà gievgia saira in rapiment d'ostagis en in tren regiunal tranter Yverdon e Sainte-Croix.
- Il rapinader è vegnì sajettà da la polizia.
- Tut ils 15 ostagis èn tenor la polizia stads da buna sanadad.
Il rapiment d'ostagis è vegnì annunzià vers las 18:35 ad Essert-sous-Champvent. Tar il delinquent sa tractia d'in um da 32 onns. Tenor la polizia sto sia identitad anc vegnir confermada senza dubi.
Il rapinader d'ostagis era armà cun ina sigir ed in cuntè e discurriva farsi ed englais, quai ha communitgà la Polizia chantunala vadaisa a chaschun d'ina conferenza da medias ad Yverdon-les-Bains. Tenor quella ha el sfurzà il locomotivist da bandunar la cabina da manischunz ed ha tegnì el a ferm cun ils 14 passagiers dal tren. Intgins dals 15 ostagis èn vegnids liads ed il tren è restà a la fermada Essert-sous-Champvent cun portas serradas.
Polizia: Sajettà tar access or da defensiun legitima
La polizia è vegnida alarmada da las persunas ch'eran serradas en il tren ed ha sinaquai bloccà il conturn. Cun agid d'in translatur da farsi hajan spezialists da contractivas da la Polizia chantunala communitgà sur telefonins dals ostagis cun il rapinader, quai ha ditg Jean-Christophe Sauterel, il schef da communicaziun da la polizia vadaisa.
Enturn 60 policists èn entant ids en posiziun en il conturn dal tren. Vers las 22:15, bunamain quatter uras suenter il cumenzament dal rapiment d'ostagis, èn las forzas armadas s'avanzadas cur ch'il rapinader na sa chattava betg en la vischinanza da las persunas serradas en. La polizia ha tenor atgnas indicaziuns mess material explosiv per distracziun avant ch'ella haja assaglì il tren.
«Cura ch'il rapinader è sa muventà cun sia sigir en direcziun dal team d'acziun, ha in policist fatg diever da sia arma per proteger ils ostagis ed ha tutgà il delinquent mortalmain», ha ditg Sauterel. El saja mort anc al lieu dal delict, malgrà ch'in medi sa chattava tar il team da l'acziun da la polizia. La polizia haja agì per defensiun legitima, uschia Sauterel.
Motiv per entant betg cler
Ils ostagis èn restads sauns e salvs tenor la polizia. Els èn vegnids tgirads medicinalmain e psicologicamain ed èn vegnids manads sin in post da polizia, nua che confamigliars spetgavan sin els. En connex cun las investigaziuns èn ils ostagis era vegnids questiunads da la polizia.
Ins na possia betg far indicaziuns davart motivs pussaivels u davart il stadi spiertal da l'um, ha ditg il procuratur public Eric Kaltenrieder. I n'era fin ussa era betg enconuschent, tar tge fermada ch'il rapinader d'ostagis saja entrà.
