Ils manaschis Grischuns han pinà l'onn 2022 passa 370'000 meters cubics laina. Quai munta ad in augment da 8% cumpareglià cun 2021.
La racolta da laina svizra ha importà l'onn 2022 5,2 milliuns meters cubics – in augment da 4% en cumparegliaziun cun l'onn 2021. Quai è il quart augment en successiun dapi l'onn 2018. Il plus è marcant tar la laina da mutagl (+4%) sco tar la laina d'energia (+7%), ils dus sortiments ils pli impurtants. La crisa d'energia, la dumonda da laina da construcziun ed ils pretschs da vendita da laina augmentads che resultan da quai han er animà ils possessurs privats da guaud perquai ch'els han chattà in martgà favuraivel. Quai resulta da la statistica forestala da l'Uffizi federal da statistica (BFS) sco er da la rait forestala da manaschis d'emprova da l'Uffizi federal d'ambient (BAFU).
La gronda part è laina da mutagl
Il volumen da laina da mutagl («laina da la resgia») ha importà l'onn da rapport var 2,6 milliuns meters cubics, 4% dapli che 2021. Quai è circa la mesadad da la racolta da laina. En la cumparegliaziun da plirs onns sa mussa che la part da laina da mutagl vi da l'entira racolta da laina è sa reducida per stgars 20 puncts procentuals. L'onn 2002 importava questa part anc circa 70%. En tut las zonas forestalas è resultada l'onn 2022 ina racolta levamain pli gronda che l'onn precedent. En las Alps e Prealps è l'augment il pli grond cun mintgamai +8%.
Dus terzs da la racolta è laina da dascharina
In'egliada tenor las gruppas da spezias da laina mussa che l'onn 2022 èn vegnids racoltads var 3,5 milliuns meters cubics laina da dascharina u coniferas ed 1,7 milliuns meters cubics laina da feglia en ils guauds svizzers. Dus terzs da la racolta da laina è consistida pia da coniferas ed in terz da laina da feglia. Questa relaziun n'è praticamain betg sa midada en cumparegliaziun cun l'onn precedent (69% a 31%). Entant che la laina da coniferas è restada quantitativamain stabila en cumparegliaziun cun l'onn 2021, è la laina da feglia s'augmentada per 11%.
Laina d'energia pli e pli impurtanta
Laina d'energia or dal guaud n'è anc mai stada uschè impurtanta sco oz: L'onn 2022 èn vegnids racoltads 2,1 milliuns meters cubics, quai che correspunda ad in augment da passa 7% en cumparegliaziun cun l'onn 2021. La laina d'energia è damai il segund impurtant sortiment e munta a passa 40% da l'entira producziun da laina. Ils ultims 20 onns è sia part bunamain sa redublada.
L'impurtanza creschenta da la laina d'energia stat en cumbinaziun cun il dumber creschent da stgaudaments da laina e cun la crisa d'energia. 1,3 milliuns meters cubics u 62% da la laina d'energia da guaud consistivan l'onn da rapport da zipladas (Hackschnitzel); questa part è sa reducida levamain dapi l'onn 2020. La laina da toc daventa pli e pli populara e s'augmenta cuntinuadamain dapi l'onn 2020. Quai po vegnir chapì sco resposta al provediment d'energia malsegir ed als pretschs d'energia creschents.
Schanza per possessurs da guaud privats
La surfatscha dal guaud da la Svizra è repartida l'onn 2022 per 71% sin fund public e 29% sin fund privat, gist sco l'onn avant. La racolta da laina sin terren privat è s'augmentada envers l'onn 2021 per 170’200 meters cubics u stgars 10% sin 1,97 milliuns meters cubics. Ina rolla impurtanta giugava en quest connex bain l'augment dals pretschs da laina.
La racolta da laina pli gronda en il guaud privat da l'onn 2022 è stada cun 70’000 meters cubics dapli (+9%) la pli gronda en il Grischun central. Las quantitads ch'ins ha racoltà en ils guauds publics èn restadas praticamain constantas en cumparegliaziun cun l'onn precedent.
Manaschis anc adina cun deficit
Ils 649 manaschis forestals ch'èn stads activs l'onn 2022 en Svizra han gì entradas da 584 milliuns francs ed expensas da 602 milliuns francs. Da quai resulta per tut la Svizra ina perdita da var 18 milliuns francs, quai envers in minus da 7 milliuns francs l'onn 2021 ed in da 44 milliuns francs l'onn 2020. En il Grischun central, en las Alps ed en las Alps dal sid han ins stuì registrar perditas. Legraivlas percunter èn las bilantschas tar ils manaschis forestals en l'artg dal Giura cun gudogns da 4,4 milliuns ed en las Prealps, ellas fatg gudogns da 2,4 milliuns francs.
Or da l'archiv: