I dat duas furmas da cancer da la pel: il cancer da la pel alv ed il cancer da la pel nair. Il cancer da la pel alv na vegn betg registrà en ina statistica, ma ins quinta cun radund 25'000 cas ad onn. Il cancer da la pel nair è dentant pli privlus – da quests hai 3'200 cas ad onn.
La rata dal cancer da la pel nair è en Svizra ina da las pli autas en l'Europa. Motivs per quai dettia blers, di Stefanie de Borba, pledadra da medias tar la Lia svizra cunter il cancer. Per l'ina passentan ils Svizzers bler temp en las muntognas, e per l'autra vegnan ils cas da cancer documentads pli exact ch'en auters pajais.
In ulteriur fatg è ch'umens survegnan pli savens cancer da la pel che dunnas.
Ins quinta ch'ils umens lavuran pli savens en il sulegl e ch'els na piglian per part betg uschè serius la protecziun cunter il sulegl.
La Lia svizra cunter il cancer cusseglia trais mesiras per sa proteger: sumbriva, vestgadira e crema da sulegl, e quai en questa successiun. Stefanie de Borba di era ch'ins na duai betg spargnar cun la crema da sulegl.
Sch'ins ha il sentiment ch'igl è memia bler crema da sulegl, lura èsi gist avunda.
Il mitus che pel brina dal sulegl protegia dal sulegl, na constettia betg, di la pledadra da medias. I na dat nagin «esser brin saun» – pel stgira dal sulegl saja pel donnegiada. Tenor las cifras vegnan ils cas dal cancer da la pel era a s'augmentar en il futur. Stefanie de Borba giavischa perquai che la protecziun cunter il sulegl vegnia prendida pli seriusa ils proxims onns.