Suenter il na a la revisiun da la lescha da CO² duain mesiras che scrodan en la lescha actuala vegnir prolungadas. La cumissiun responsabla dal Cussegl dals stadis ha approvà unanimamain in’iniziativa parlamentara che è vegnida inoltrada da la cumissiun correspundenta dal Cussegl naziunal.
Cuntinuar cun restituziun ed obligaziun da cumpensar
Diversas mesiras da la lescha actuala da CO² èn limitadas. Per exempel scroda davent dal 2022 la regulaziun per restituir l’imposta sin CO² ad affars, sche quels s'obligheschan da reducir las emissiuns. Era l'obligaziun da cumpensaziun per firmas ch'importeschan benzin e diesel scroda la fin da l'onn. Quellas firmas duessan però vinavant stuair investir en projects che protegian il clima.
Las cumissiuns dattan gas: Tractà vegn proxima sessiun
Quellas mesiras duain vegnir prolungadas il pli svelt pussibel tenor las cumissiuns da las duas chombras. I sa tracta tenor las cumissiuns d'instruments centrals per la protecziun dal clima. Planisà è che la basa legala vegn discutada gia en la sessiun d’atun che cumenza mez settember.
