Suenter il Cussegl dals chantuns ha il mardis era il Cussegl naziunal approvà la moziun che vegn anc da l'anteriura cussegliera naziunala da la partida socialdemocratica, Silva Semadeni.
Blers hotels en las regiuns sajan in pau antiquads, e n'adempleschian betg pli las spetgas dals giasts. Per pudair renovar ils bajetgs e l'entira infrastructura, manchian als possessurs dentant savens ils daners. Perquai vul il parlament sustegnair hotelieras e hoteliers en las regiuns alpinas. Als manaschis manchia l’agen chapital necessari per las investiziuns. E els na survegnian perquai strusch credits da las bancas. Uschia l’avis da la maioritad tar quella che tutga era il politicher grischun da la partida socialdemocratica Jon Pult. Per el èsi cler che quels alloschis ston vegnir sustegnids. Hotelieras e hoteliers hajan pati en ils ultims onns sut la concurrenza da las segundas abitaziuns e na hajan uschia pudì metter da la vart in agen chapital per investir en lur hotel e daventar pli innovativ. In tal credit possia era segirar plazzas da lavur sche quel pussibilitescha al hotel da surviver.
Adversaris da la moziun teman però che i pudess vegnir investì en hotels che na han gi nagin concept fritgaivel enfin ussa e cha la sanaziun na purtass lura era betg dapli giasts.
Betg cunter l'idea sco tala, dentant vuschà encunter la moziun ha la politicra grischuna da la partida liberaldemocratica Anna Giacometti. La fracziun liberaldemocrata haja decidì da sustegnair in'autra moziun che vul promover il turissem e quai en tut la Svizra cun instruments enconuschents.
Tuttina è ella spannegiada tge soluziun per il program d'impuls che il Cussegl federal preschenta al parlament.
Il Cussegl federal na vuleva en sasez che la moziun vegn approvada. I dettia gia instruments da promoziun, sco per exempel la societad svizra per credits a l’hotellaria.