La Protecziun svizra dals animals vegn gia crititgada dapi in temp. Sco il «SonntagsBlick» rapporta, saja uss ina dispita en la direcziun da l’organisaziun escalada. Dus commembers – che la presidenta Nicole Ruch aveva suspendì – hajan denunzià ella pervi da delicts uffizials. En consequenza sa retiria ella da la fatschenta operativa. Quai ha Ruch ditg envers il «SonntagsBlick». En l’avegnir veglia ella sa concentrar sin incumbensas strategicas.
Investigaziuns pervi d'administraziun malfidaivla
La procura publica da Basilea investighescha cunter Ruch pervi dal suspect da gestiun malfidaivla e fatschentas cun immobiglias dubiusas. Ruch refusescha tut las renfatschas e na vul betg demissiunar sco president da la Protecziun svizra dals animals. Quai malgrà ch’il squitsch or da las atgnas retschas crescha vinavant.
La finala pateschan ils animals
En tut cas donnegian las turbulenzas en la suprastanza da l’organisaziun la reputaziun da la Protecziun svizra dals animals. Tenor Rolf Frischknecht da la secziun bernaisa giaja uschia la fidanza dals fauturs e fauturas a perder. Quai sentian ins er tar las donaziuns. Quellas èn ina funtauna d’entradas centrala da l’organisaziun. L’onn passà ha ella survegnì otg milliuns francs en furma da donaziuns ed iertas. Sco i va vinavant cun la Protecziun svizra dals animals vegn a sa mussar a la radunanza da delegads l’entschatta da november.
Ord l'archiv