En l'avegnir sto la gasetta esser sin il pli tard a las 12:30 uras en la chascha da brevs, e quai en l’entira Svizra. Quai ha il Cussegl federal decis en l'ordinaziun da la posta. El suonda uschia a la pretensiun dal parlament.
Regla sto esser grantida per 95%
La Posta sto garantir la distribuziun da las gasettas fin a mezdi en almain 95% dals cas, scriva il Cussegl federal. Plinavant oblighescha il Cussegl federal la Posta da purtar las gasettas en tut las chasadas ch’èn abitatas l’entir onn.
Fin ussa na valeva quai betg per chasas ch’eran dapli che duas minutas viadi davent dad ina localitad. Sulet en cas excepziunals po la Posta restrenscher u sistir quest servetsch. Las novas reglas valan a partir da l'auter onn.