Suenter ina pausa sfurzada da dus onns pervi da corona ha ier puspè gì lieu la Street Parade a Turitg. Radund 900'000 persunas sajan sa participadas a la pli gronda tecnoparty dal mund – pia radund 50'000 dapli ch’anc l’ultima giada il 2019. Quai han communitgà ils organisaturs e las organisaturas da la 29avla ediziun. Da la partida sajan stads giuvenils, famiglias cun uffants sco era persunas pli veglias.
Bilantscha da la polizia
La Polizia da la citad fa bilantscha positiva da l’event. Sin las vias da Turitg èsi stà per la pli gronda part paschaivel. Tuttina hai dà singuls incidents. Strusch che la Street Parade ha gì entschiet è in um da 27 onns najà. Ed en il decurs da la saira e la notg hai dà inqual dispita. Pliras dunnas èn daventadas unfrendas da mulesta sexuala. Intginas persunas èn vegnidas arrestadas pervi da ladernitschs u commerzi da drogas.