Tar tschertas assicuranzas supplementaras d'ospital hai dà irregularitads, quai ha scuvert la Surveglianza federala da finanzas Finma. Perquai porta la Fundaziun per la protecziun dals consuments uss plant encunter ils responsabels tar la procura publica.
Las irregularitads fetschian star si dretg il chavels, uschia scriva la fundaziun. Tranter auter vegnian las prestaziuns quintadas dubel e quai a moda sistematica. Tar pazientas e pazients assicurads supplementarmain quintian ospitals automaticamain onuraris pli auts. La fundaziun scriva ch'i sa tractia da cugliunaria e da gestiun malfidaivla.