Las Swisscom ha en Svizra radund 80 antennas da telefonia mobila en clutgers. Baselgias sajan bajetgs fitg centrals en las vischnancas ed en las citads. Il clutger è savens in zic pli aut che tschels bajetgs, tge che fetschia or d'el in lieu ideal per in'antenna, uschia la pledadra da medias da la Swisscom, Annina Merk. Perquai ha l'interpresa da telefonia dumandà la Plaiv catolica da Glion sch'ella possia installar ina antenna da 5G en il clutger.
Sche la rait da la telefonia mobila en ina regiun è buna, è la radiaziun pli pitschna, perquai ch'ils telefonins ston emetter pli pauc.
La radunanza generala da la plaiv ha votà davart quella fatschenta ed ha concedì quest dretg a la Swisscom. Tenor il president da la plaiv catolica da Glion, Jürg Schmid, stoppian ins avair ina rait sch'ins veglia duvrar il telefonin dapertut. Uschia haja la plaiv mess a disposiziun il clutger per cuntanscher quella finamira. Il telefonin possia salvar vitas, uschia Jürg Schmid.
Sche nus vulain duvrar il telefonin, stuain nus avair ina rait cumpletta.
L'antenna da 5G per in meglier transfer da datas
Tobias Schneider che n'abitescha betg lunsch davent dal clutger manegia che la decisiun da la plaiv catolica saja dispitaivla. Quella na sa basia betg sin ina decisiun democratica, cunquai che betg tut ils vischins hajan pudì votar davart questa antenna. El è da l'avis che la vischnanca politica stuess planisar ed er decider davart tals indrizs. Plinavant na saja quai betg l'incumbensa da la Pleiv catolica da Glion da procurar per il provediment da la rait da telefonina mobila.
Jau vi che quai vegn fatg da moda transparenta e ch'ins fa quai da moda democratica, sco quai è usit en noss stadi.
Ins sappia ch'ina terza da las datas vegnian duvradas per far il «streamen» cuntegns pornografics, tge che na saja franc betg en il senn da la plaiv. Sin quai parescha Jürg Schmid ch'i saja sco cun ils medicaments. Ils effects positivs predomineschian ils effects secundars. La plaiv n'haja nagina influenza sin tge che vegnia consumà.
Dumonda da bajegiar per la segunda giada
La Swisscom ha inoltrà il favrer la dumonda da bajegiar, uschia che la vischnanca ha da decider davart quest project. L'interpresa da telefonia stoppia uss anc ina giada inoltrar la dumonda, perquai che l'emprima dumonda haja gì in sbagl. L'adressa n'era betg inditgada correctamain, ha la Swisscom ditg sin dumonda d'RTR.
La vischnanca n'ha betg prendì posiziun davart il project, perquai ch'i sa tractia d'ina procedura currenta. La zona da planisaziun communala per implants da telefonia mobila preveda dentant mo che las antennas na dastgan betg esser visiblas pervia dal maletg dal lieu. Uschia ha la vischnanca da lubir ina tala installaziun en quella zona. E nua ch'i dovra antennas, decidan las purschidras da telefonia mobila e betg il maun public.
