Las novas investigaziuns cunter l’anteriur schef da la banca Raiffeisen, Pierin Vincenz, vegnan probablamain messas ad acta.
Quai ha la procura publica da Turitg confermà envers l’agentura da novitads Keystone-SDA.
La procura publica ha investigà sch’i dat rinfatschas relevantas dal punct da vista penal cunter Vincenz en connex cun ina transacziun dal 2014.
Concret vegn suspectà che Pierin Vincenz e ses cussegliader hajan laschà sa pajar ora secretamain daners. Quai en connex cun in augment dal chapital dal purschider da products finanzials, Leonteq.
Novas investigaziuns en il cas Pierin Vincenz
En il cas da l’anteriur schef da la banca Raiffeisen, Pierin Vincenz, fa la procura publica da Turitg para novas investigaziuns. Quai rapporta la «SonntagsZeitung». Concret vegn suspectà che Vincenz e ses cussegliader Beat Stocker hajan sa laschà pajar or secretamain daners da l’actual schef dal purschider da products finanzials Leonteq, Lukas Ruflin e dal fundatur da l'interpresa, Jan Schoch.
En il rom d’in augment dal chapital il 2014 hajan els vendì dretgs d’acquist a la Raiffeisen. La procura publica haja però suttastritgà ch’i saja er pussibel che tuts involvids sajan nunculpants. Ruflin, Schoch e Stocker n’hajan fin uss betg savì da las investigaziuns e refuseschian tut las renfatschas. Sco adina vala la presumziun d'innocenza.
Or da l'archiv:
