En Svizra s’augmentan ils pretschs da victualias vinavant. Quai ha ditg Martin Keller, il schef dal concern agrar Fenaco, envers la «SonntagsZeitung». A Fenaco tutgan tranter auter las butias da Volg e Landi. Gia las ultimas emnas haja dà pitschnas adattaziuns dals pretschs. Quellas correspundian en media a la chareschia da 2,5%. Sco exempel ha numnà Keller biera e farina. Pervi da la guerra en l’Ucraina sajan las materias primas agraras uschè charas sco anc mai.
Custs da producziun pli auts
Fenaco furnescha semenza e fertilisaders als purs. La racolta da l’onn passà na saja insumma betg stada buna – ed uss stoppian els anc pajar dapli per diesel, pavel d’animals e fertilisaders. En consequenza pretenda l’Uniun purila svizra radund 10 pertschient dapli per legums e fritgs e 5 pertschient dapli per charn, cumpareglià cun l’onn passà.
