Il Cussegl federal refusa ina taglia sin iertas en favur dal clima. El ha decidì da refusar l'iniziativa «per in fond per il clima» e quai senza ina cuntraproposta. En ils egls dal Cussegl federal è quai la faussa via per cuntanscher las finamiras dal clima. L'iniziativa da la Juso pretenda ina taglia da 50% sin iertas e donnaziuns da passa 50 milliuns francs. Las entradas da questa taglia duain la Confederaziun ed ils chantuns impunder per cumbatter la crisa dal clima.
La PS ed ils Verds han inoltrà l'iniziativa il favrer
Sco las duas partidas han communitgà, han ins surdà a la Chanzlia federala bunamain 130’000 suttascripziuns. Da quellas sajan radund 105’000 valaivlas. L’iniziativa dal pievel «Per ina politica energetica e climatica gista: investir per la prosperitad, la lavur e l'ambient» ha il sustegn d’ina allianza d’organisaziuns per la protecziun da l’ambient e sindicats.
Sustegn per projects a favur dal clima
Ils meds or dal fond per il clima duain lubir d’installar dapli panels solars, da cuntinuar cun las sanaziuns da bajetgs, da schlargiar il traffic public e da promover il mantegniment da spazis da viver e da la diversitad da las spezias. L’iniziativa «per in fond per il clima» pretenda, che la Confederaziun sustegnia cun in fond emplenì cun milliardas projects en favur dal clima – projects che vegnan dals chantuns, da las vischnancas u da terzs. Finamira fiss che la Confederaziun dovra mintg’onn 0,5 fin 1 pertschient dal product interiur brut BIP, per far investiziuns en la modernisaziun ecologica da la Svizra.
Il suveran svizzer pudess decider circa il 2026 en chaussa.