Il cussegl dals stadis ha dat in cler signal per la cunvegna da clima da Paris. Cun ina discussiun che e ida sur 1 ura han ils parlamentaris intunà l’importanza da la cunvegna.
La svizra saja congualà cun auters pajais cleramain in dals pajais che è responsabel per paucas emissiuns, dentant tant pli pertutgada è la Svizra dal midament dal clima. Oramai che il clima n’enconuscha betg cunfins.
Dentant n’èn betg tuts en il parlament per la cunvegna. Opposiziun vegn da la vart dretga en il parlament. La Svizra saja pitschna e gia sin buna via quai che pertutga las emissiuns da CO2. Uschè saja quai tant pli ambizius per la Svizra da tegnair en las finamiras.
Finamira reducir emissiuns da CO2 – ma quant
Cun ratifitgar la cunvegna da clima da Paris vul la Svizra gidar ad accumplir la finamira che la temperatura na s’augmenta per dapli che 2 grads. Tge che quai munta propi per la Svizra n’è anc betg cler. Impurtant vegn ad esser la debatta da CO2 en il parlament. Là vegn lura discussiunà sur da las mesiras concretas.
Finamiras da cunvegna da clima da Paris
La finamira da la cunvegna da Paris è da reducir las emissiuns mundialas da CO2 per 50% fin l’onn 2030 quai cumpareglià cun l’onn 1990.
Ina minoritad en il parlament, vul reducir las emissiuns da CO2 be per 30%. Quai cun l’argument, che la Svizra ha gia uss fitg paucas emissiuns en cumparegliaziun cun ils auters pajais. Ma il Cussegl federal propona perfin da reducir las emissiuns per 60%.
La cunvegna e sia rolla globala
Cun la decisiun dal president dals Stadis Unids da l’America Donald Trump da betg pli far part a la cunvegna è il segund grond pajais responsabels per ina gronda part dal stgaudament dal clima sortì da la cunvegna.
Las reacziuns èn vegnidas da l’entir mund e propi chapientscha n’ha nagin mussà. Era en il Cussegl dals chantuns è il num Donald Trump crudà e quai pliras giadas.
Però divers experts han ditg, che primo na po Donald Trump betg sortir da la cunvegna avant il 2020. Segundo datti blers guvernaturs ch’èn cunter la decisiun dal president american e terzio dettia quai era in midament en l’economia americana. Bleras firmas emprovan da reducir il CO2 era senza la cunvegna.
Dentant la Svizra ha cun questa decisiun ed il «gea» a la lescha d’energia dà in cler signal per far frunt a la midada dal clima.
RR actualitad 12:00
