L'Autostrada A1 duai vegnir schlargiada sin almain sis vials tranter Berna e Turitg sco er tranter Losanna e Genevra. Quai vul il parlament. Suenter il Cussegl naziunal ha er il Cussegl dals chantuns acceptà ina tala proposta dal Cusseglier naziunal Erich Hess da la PPS.
Mez settember ha il parlament decidì che l'A1 tranter Le Vengeron GE e Nyon VD duai vegnir engrondida sin sis vials, sch'il Cussegl federal approvescha il project general per quest engrondiment anc quest onn. Era gia cler è che l’A1 tranter Berna-Wankdorf e Schönbühl BE duai vegnir schlargiada dad oz sis sin otg vials e tranter Schönbühl e Kirchberg BE sin sis vials. Quests projects èn ina part dal pass d’amplificaziun 2023 per las vias naziunalas.
Organisaziuns d'ambient han cumenzà curt suenter questas decisiuns cun rimnar suttascripziuns per il referendum. Il pievel dastgass avair l'ultim pled en chaussa.
