Il maldiever da credits da Covid è pli grond che quintà fin uss. A questa conclusiun vegn la «NZZ am Sonntag» che sa referescha a cifras novas dal Secretariat da stadi per l’economia. Fin uss sajan potenzialmain radund 290 milliuns francs da credits da Covid vegnids malduvrads. Avant in onn haja la Confederaziun anc quintà cun radund 200 milliuns francs.
Surmanà 2'500 fraudaders e fraudadras fin qua
Ils cugliunaders e las cugliunadras vegnian – tenor la gasetta da la dumengia – il pli savens da la branscha da construcziun, la gastronomia e dal commerzi. Tranter auter hajan els fatg faussas indicaziuns davart lur svieuta, tschentà dumondas da credit tar pliras bancas u ch’els sajan s’annunziads cun firmas inactivas. Cumpareglià cun l’entira summa da credit da bunamain 17 milliardas francs muntia la quota da fraud a radund 1,7%. Per la summa da delict scuverta fin qua da 290 milliuns francs, sajan 2’500 persunas stadas responsablas. Dentant sajan anc 4’600 cas pendents, uschia che la summa defraudada pudess anc s’augmentar marcantamain ils proxims onns
Il senn dals credits da Covid da la Confederaziun era da gidar interpresas pitschnas e mesaunas ch’eran vegnidas en las stretgas pervi da la pandemia.
