En Svizra ha bunamain mintga quarta persuna che lavura in’occupaziun supplementara. Quai rapporta la «NZZ am Sonntag» che sa referescha ad ina retschertga represchentativa da la firma da cussegliaziun PwC. Tenor quai stoppian blers emploiads ed emploiadas surpigliar in segund job per pudair ademplir lur obligaziuns finanzialas.
58% da las persunas dumandadas hajan inditgà d’avair problems da pajar tut ils quints la fin dal mais. Retschertgas da la Confederaziun quintian cun in dumber pli bass da persunas cun plirs jobs. Dentant constateschan er sias retschertgas ch’il dumber creschia.
La situaziun pudess anc s’intensivar, avertescha l’Uniun sindicala svizra: La capacitad da cumpra sa reduceschia, ils pretschs creschian pli spert che las pajas. Dal punct da vista da l’Uniun svizra da las patrunas e dals patruns dettian questas cifras in fauss maletg: Betg tut quellas persunas cun plirs jobs sajan paupras.
