La ministra da la giustia, Elisabeth Baume-Schneider vul reducir il contingent d’immigraziun or da stadis terzs. Quai mussan retschertgas da radio SRF. Per quest onn a il Cussegl federal fixà en tut 12’000 lubientschas per persunas or da pajais terzs e la Gronda Britannia.
Uss vul Baume-Schneider metter ensemen ils dus contingents e reducir quels sin 9'600. La proposta da la cussegliera federala è uss en consultaziun tar ils auters departaments.
Il president dals directurs e las directuras chantunals da l'economia publica è trumpà da questa proposta en vista a la mancanza da persunal qualifitgà. Il Cussegl federal sa barata mintgamai cun ils chantuns avant che fixar il contingent d'immigraziun.
In'autra vista sin la problematica han ils sindicats. Sche firmas pon recrutar damain collavuraturas e collavuraturs da terzs stadis crescha il squitsch d'integrar meglier fugitivas e fugitivs cun bunas qualificaziuns. Daniel Lampart da l'uniun sindicala vesa adina dapli che persunas en fugia na vegnian betg emploiads a moda adequata. El numna in exempel d'in um da l'Iran, che fa mo lavur d'agid tar la posta e na possian betg sa sviluppar, er sch'el haja excellentas qualificaziuns.
Er ina commembra da la direcziun da la federaziun da patruns deplorescha la reducziun. Il contingent saja per persunal qualifitgà, ch'ins na chattia betg aifer l'UE e la Svizra. Daniella Lützelschwab da la federaziun da patruns di er, che firmas che na dastgan betg emploiar las persunas ch'ellas veglian possian midar per quai lur sedia e bandunar la Svizra.
L'entir Cussegl federal decida en las emnas che vegnan davart il contingent. La reducziun saja tenor SRF er ina reacziun sin la debatta da migraziun ed il resultat en las elecziuns naziunalas.