Firmas grondas internaziunalas che fan ad onn ina svieuta da 750 milliuns francs e dapli pajan a partir da l'auter onn en Svizra ina tariffa fiscala minimala da 15%. Quai aveva il suveran svizzer decidì la stad passada.
Il Cussegl federal ha decidì da metter en vigur l'ordinaziun persuenter gia a partir da l'auter onn. Cun quai introducescha il Cussegl federal l’uschenumnada taglia minimala da l'OECD, che la populaziun svizra ha acceptà a l'urna la stad vargada. Cun questa applicaziun sperta vul il Cussegl federal evitar che summas da taglia giajan anc egl exteriur e mitschian la taglia svizra, communitgescha il departament federal da finanzas.
La maioritad dals stadis da l'Uniun europeica ed ulteriuras naziuns industrialas mettan era en vigur la tariffa da taglia minimala da 15% per firmas grondas transnaziunalas cun l'entschatta da l'auter onn.
