Organisaturs da concerts gronds ed autras occurrenzas culturalas pretendan dal Cussegl federal dapli transparenza. Per planisar occurrenzas dovria quai ina tscherta segirtad. Tar la intschertezza dad oz na cumpria strusch insatgi in bigliet, sco la Federaziun svizra d’organisaturs d’occurrenzas ha ditg envers «10 vor 10» da SRF.
Cussegl federal infurmescha probablamain oz
Il Cussegl federal duai dir ordavant, tge reglas che valian en trais mais per occurrenzas grondas. Probablamain discutescha il Cussegl federal anc oz, sche la limita da 1'000 persunas tar occurrenzas grondas resta u betg. En vista a questa decisiun ha la branscha d’events rinforzà ses lobbying.
