La Partida liberal-democratica svizra vul cumbatter il scumond da construir novas ovras atomaras. La strategia d’energia actuala stoppia far naufragi. Quai ha ditg il president da la PLD, Thierry Burkart envers la «NZZ am Sonntag». Perquai veglia la suprastanza preschentar ina proposta a la fracziun per sfurzar il Cussegl federal da surlavurar sia strategia.
Cussegl federal encunter
Discutar davart novas ovras atomaras na fa actualmain nagin senn quai ha ditg il minister d’energia Albert Rösti envers la «Neue Zürcher Zeitung» la sonda. Las ovras existentas duajan restar en funcziun uschè ditg che la segirezza saja garantida. Da quai sajan Confederaziun, chantuns e gestiunaris perina.
I dovria ina nova valitaziun da la dumonda da l’energia atomara manegia Burkart. Dapi la decisiun dal pievel il 2017 èsi scumandà da construir novas ovras atomaras en Svizra. Da lez temp è la PLD anc sezza stada per questa lescha. Tenor Rösti duai la producziun d’energias regenerablas vegnir augmentada sin radund diesch pertschient dal consum total entaifer ils proxims diesch onns.
Uschia possian ins impedir mancanzas durant l’enviern. Plinavant ha ditg Rösti ch’i na dovria betg per tut pretsch ina cunvegna davart l’energia electrica cun l’Uniun europeica. Er ina tala na saja nagina garanzia per temps da crisa, uschia il minister d’energia.